編按：這是一篇以台語文來寫作的文章，對非使用河洛話的讀者而言，或許會閱讀的比較吃力，但因這是作者的寫作方式，我們希望予以尊重，因此也請不熟悉的讀者試著耐心閱讀，但如果您在理解或閱讀上有疑問，也歡迎留言或表達您的看法，謝謝。薛西佛斯的處境──好親像是生做人，無法度閃避的運命！
2008年2月11日，我到學校。雖然是寒假最後一工，嘛是寒假，我到學校創啥？其實，身為一個學校的負責人，是無放寒暑假，無分上下班，一粒心肝，思思念念的攏嘛是校務、師生、校園環境，就算佇厝、佇遠地遊賞風景，猶原無法度完全放下。見賢思齊，看人好的表現、措施，tioh8-siau3肖想欲橫徙入家己的學校做看mai3，這可能是做校長的人普遍的想法、心情、和運命才對。
今仔日到校，將學校巡巡看看咧以外，我另外有三個目的：第一，供應四間學校將近兩千人的廚房拼掃和開工祭拜。第二，幼稚園老師返校備課。第三，欣賞阮喝出「百年人種千年樹」的口號，募款60萬，拄種落猶未滿月tioh8變樹林的五葉松林。
踏入校門，前庭攏是糞圾：炮紙、炮筒、炮火迹、香跤、牛乳、suh4管、薰截仔、衛生紙、掃手頭、爛報紙、空紙杯、塑膠袋、塑膠湯匙、麥香鋁箔包、飛衝天炮袋、500CC lim1無一半的咖啡牛奶……真是應有盡有。
校埕的糞圾
這種場景，我已經慣si3，身為教育人，我siau3想改變社區人士、社區青少年的觀念、態度和行為，用盡苦心和辦法，利用各種公私場合，動情宣導，愛護咱的母校，疼惜咱的子弟，毋拘無效。Tshua7狗入校放狗屎的人，猶原tshu7狗入校；暗光鳥青少年照常像猪，行到叨位糞圾tue3到叨位；甚至拄放寒假，操場噴水頭被偷五粒，另外分別掠著兩個欲食驚流汗、欲開毋討趁的青年人，移送警察局……這種趨勢，親像補破網，愈補愈大孔！欲按怎？阮欲按怎才好？阮愛按怎才會好勢？
行向五葉松園區，看著青翠青翠的五葉松，佇寒風中摇動；松樹跤大板草青青青，精神百足，使人感動。這當陣───
「校長－」
只看走廊中央，翁老師正手提翕相機，倒手指壁予我看。我徙偎看，看猶未清楚，大聲喝出來：「屎！哪裏遐濟屎！」是啊，屎，走廊滿滿是，牆壁滿滿是，指示牌滿滿是，隨意、隨心、隨手舞到叨位，屎糊到叨位。
「校長－毋是屎，是巧克力！」
翁老師澄清講。原來，期尾的時，幼稚園新買一罐巧克力，連一罐用無了的，囥佇窗仔門邊，誰知有裝鐵窗的鋁窗被硬掰開，有人，應該是青少年（流落大大大的巧克力手印會當證明），巧克力大罐大罐，歸罐提未出來，就手伸入內，將巧克力挖挖出來，然後－四界糊、－四界印、－四界tan3，壁、窗、指示牌、鐵窗、玻璃、欄杆……到處攏是。若無小心，衫褲就會ko7－tioh8，皮鞋就會tsam3-tioh8，彼的感覺，親像ko5－tsam3著屎共款。
看幼稚園老師，tshua7領幼稚園老師家己的子女，用水泵、用水洗、用筅仔lu3的辛苦身影，我真毋甘！這的功課（khang1-khue3），攏是加的，其實學校真濟功課攏是加的，因為社區人士無公德心、無愛心，因為青少年無聊、無代誌，有thau3袂開的鬱卒、痛苦、冤屈，只好thu2踏學校、損害公物、發洩伊無人理解的情緒，真是悲哀啊！
巧克力手印
Koo5壁牆以及走廊的巧克力
身為教育人，我常教育學生：「人，未使予同一粒石頭觸倒二擺！」面對家己經營的學校環境，一再出現重複的失敗錯誤，阮欲按怎才好？這，敢是人性的真面目？這，敢是人類的運命───佇是—非、善－惡、光明—烏暗、毀滅—創造中浮沉對tioh4？我想起希臘薛西佛斯的神話，直欲成功、直欲sak4上山頭的大石頭，又閣輾輾落來的悲哀！
身為一個教育人，就算是薛西佛斯，就算失敗是命中註定的，我嘛欲拍拼，拍拼享受sak4石頭上山頭的過程，享受peh4崎的人文血汗、沿山風景和將近成功的成功本身，嘛有伊的教育意義kah4價值啊。
附註：
1、巧克力戰爭是美國出版的一本冊的冊名。
2、因為巧克力戰爭這本冊引起的一件新聞風波：
芝加哥論壇報，50外名家長聯名要求美國西南角公立中學，將七年級指定閱讀冊單──巧克力戰爭刪除。因為，巧克力戰爭這本冊的內容是性和暴力。
校長西恩依格接著訊息了後，馬上請教律師，然後寫一張公開批予in1學校的家長。批的內容是───
第一、我支持老師提供我的專業意見，彼著親像我袂過問、干涉lin2兜的家內事相款。
第二、這本冊是咱美國圖書館公認，議題豐富的十大挑戰冊之一。
第三、這本冊猶原是咱七年級學生指定閱讀的冊單。
第四、 lin2遮的和教育立場倒反，和老師hau2無相聲的家長，若害咱的囝仔學袂好勢、學學歹，後果lin2愛家己負責。
哇！有夠有專業道德和勇氣的教育人，真是使人敬佩！
3、阮學校發生這件代誌，套用這冊名，感覺誠合su1、誠滿意；將美國人表現「教育專業」的霸氣寫落來，但願對tue3潮流、tue3家長行的教育人，有淡薄仔啟示作用。